Khotbah Minggu, 25 Nopember 2012
EP: Pangungkapon 1: 4b - 8; EV: Daniel 7: 10+13-14; S.Patik: 5 Musa 5: 29
Angka Namonang i Do Bahenon ni Debata Mananda Hasonangan
Molo minggu sadarion digoar do minggu ujung taon huria, boasa didok minggu ujung taon huria? Ringkot do di huria i mamboto angka pelayanan ditonga-tonga ni huria dinasataon i. Di minggu ujung taon huria on ma digoari minggu parningotan diangka ruas ni huria namonding, boasa goaron pola i? Pabotohonon tu angka keluarga, sisolhot ni angka ruas ni huria naparjolo marujung ngolu i, paboa naingkon salpu do sogot ngolunta sian hasiangan on (bnd. BE. No. 134), huhut manosoi tu angka keluarga namarsitaonon dinasataon pelayanan ni huria i paboa angka namonding dibagasan Tuhan i taruli do i dihasonangan/ hangoluan (Fil. 1: 21). Jala marhite minggu ujung taon huria dipaingot tu hita halak Kristen paboa saguru di Debata do hape saluhut ngolunta on. Naeng ingotonta paboa namartiti be do sude ngolunta on/ ada batasan hidup (Parjamita 3). Molo naung ingot do hita disi naberarti lam marsihohot ma hita marhaporseaon di Tuhan i. Ai golan halak naporsea do namasuk tu harajaon ni Debata Surgo hasonangan i.
Molo tajaha di jamita sadarion boi buatonta impolana Manongtong do Harajaon ni Debata Ro di Salelengnilelengna, sian impola on boi ma dipangidohon asa masihohot hita marhaporseao di Tuhan i. Dipatorang do dijamita on paboa adong pangungkapon naniida ni si Daniel taringot tu binatang naopat dohot tanduk nametmet. Binatang naopat i manggombarhon opat harajaon napanganti soring marhuaso, parjolo ma i harajaon Babel (bnd. 2: 36-38; 7: 4), napaduahon harajaon Media (bnd. 2: 38-45; 7: 5); napatoluhon harajaon Persia (5: 28; 7: 6); napaopathon harajaon Junani naginonggoman raja Alexander agung (7: 7 - 8). Sian pangungkapon ni si Daniel on boi antusanta, sipata diloas Debata do angka parjahat marhuaso di portibion, alai hahuasoon, hharajaan ni parjahat i ndada namanontong i.
Si Daniel mamereng ia bangso nanirajaan ni angka rajana nungga lam godang mangadopi angka persoalan ni ngolu tarlobi angka ngolu natidak pasti. Ima panghorhon angka raja namanggomgomi nasida hatiha i manguluhon bangso i ndang biar mida Jahowa. Holan mangasahon gogo, pingkiran dohot huaso nama nasida.
Dua bagian niondolhon jamita on tu hita:
1. Harajaon ni portibion mangadopi panguhuman ni Jahowa (ayat 9-10)
Panguhuman ni Jahowa na ro tu portibion pabotohon paboa naso margogo do angka raja ni portibion, harajaon ni Jahowa do nahot salelengna. Sian jamita on, boi idaonta harajaon ni Debata namanontong i ia harajon ni portibion uhumon ni Debata do marhite hasintongan dohot hatigoran ni Jahowa. Marriburibu halak marsoma ro tu Jahowa, jala marloksaloksa angka surusuruan marhaladoi/ melayani Debata laho patupa proses panguhuman tu saluhut jolma dohot tu saluhut panggomgomi di portibion. Panguhuman ni Debata i ima mambuka buku pustaha namarisihon angka ulaon ni jolma i (bnd. 2 Musa 22: 23; Psalm 56: 9; Yes. 65: 6; Malk. 3: 16).
2. Haroro ni Anak ni Jolma i (ayat 13 - 14)
Si Daniel mamereng ia bangso nanirajaan ni angka rajana nungga lam godang mangadopi angka persoalan ni ngolu tarlobi angka ngolu natidak pasti. Ima panghorhon angka raja namanggomgomi nasida hatiha i manguluhon bangso i ndang biar mida Jahowa. Holan mangasahon gogo, pingkiran dohot huaso nama nasida.
Dua bagian niondolhon jamita on tu hita:
1. Harajaon ni portibion mangadopi panguhuman ni Jahowa (ayat 9-10)
Panguhuman ni Jahowa na ro tu portibion pabotohon paboa naso margogo do angka raja ni portibion, harajaon ni Jahowa do nahot salelengna. Sian jamita on, boi idaonta harajaon ni Debata namanontong i ia harajon ni portibion uhumon ni Debata do marhite hasintongan dohot hatigoran ni Jahowa. Marriburibu halak marsoma ro tu Jahowa, jala marloksaloksa angka surusuruan marhaladoi/ melayani Debata laho patupa proses panguhuman tu saluhut jolma dohot tu saluhut panggomgomi di portibion. Panguhuman ni Debata i ima mambuka buku pustaha namarisihon angka ulaon ni jolma i (bnd. 2 Musa 22: 23; Psalm 56: 9; Yes. 65: 6; Malk. 3: 16).
2. Haroro ni Anak ni Jolma i (ayat 13 - 14)
Ia nanidokna di ayat 13 namandok ..... ro sahalak marhite ombun dilangit i, songon anak ni jolma, jala sahat Ibana tu Ibana (Jahowa) na so suda arina, di ayat 14 muse didok dibagabagahon ma tu Ibana pamarentaon, hamuliaon, dohot harajaon dohot saluhut bangso. Marsomba tu anak ni jolma ima saluhut na di tano on jala ro di salelenglelengna do harajaonNa i (bnd. Pangungkapon 1: 4b-8). Salpu nama angka harajaon ni portibi, ai naro nama harajaon ni Tuhan i, martudu-tudu ma on tu Tuhan Jesus Kristus napaluhon jolma disuru Debata, naeng tubu ma Jesus di portibion asa anggiat jolma na di tano on gabe muba jala malua sian angka hajahaton ni nasida i.
Halak naporsea jala namarpanghirimon di Tuhan i dilehon do sada jaminan ni ngolu paboa naso manongtong angka hasusaan, hangaleon dohot parungkilon naro tu hita, saluhutna i nalaho salpu do. Marujung do sude nadiportibion, baik las ni roha, parungkilon, hapogoson nang hamoraon pe, jala dipaingot do hita marhite jamita on nang hita jolma pe marujung do, ido umbaen adong pandohan Memontomori namarlapatan do i ingot ari hamamatem, naberarti marujung do nang jolma i. Jadi molo pe adong angka keluarga, sisolhot nang tondongta naung jumolo marujung sian hita unang pola sai dihagaleon be hita, alai mardongan pos niroha dohot panghirimon marhite haporseaon na togu tu Debata nang Jesus paboa di adopan ni Debata ndada namarujung nasida. Alani manontong ma hita di Jahowa namantongtong salelengnai i asa tung marhasonangan ngolunta on, taingotma aha nanidok di Matius 6: 33 "Sai jumolo ma lului hamu harajaon ni Debata dohot hatigoranna dungi tambahononna ma angka ondeng tu hamu". Holan dibagasan hatigoran nang hasintongan ni Debata do jumpa di hita saluhut namarhasonangan. Marsihohot ma hita dihaporseaonta tu Jesus Kristus asa parsidohot/ parjambar hita dihasonangan nasian Surgo i. Amen
