Halak Naporsea di Debata Gabe Sorminan do

Jamita Minggu, 10 Pebruari 2013

EP: 2 Musa 34: 29-35; EV: 2 Korintus 3: 12 – 4: 2;  SP: Roma 1: 16-17

Halak Naporsea di Debata Gabe Sorminan Do i

I.     Patujolo

Ia Huria Korintus sada Huria nabalga napinajongjong ni Apostel Paulus. Songon sada huria nabalga huria i mangadopi tantangan do nasida sian angka pengajar-pengajar palsu (angka apostel pargapgap). Hinorhon ni pangajarion ni angka apostel pargapgap i gabe lam sumurut do haporseaon ni huria di Korintus, gabe tubu do nang di roha nasida roha nanaeng maghalupahon pangajarion ni Apostel Paulus naung saleleng on di hangoluon nasida.  Marhiteon i ma Apostel Paulus uju na dipenjara i ibana manogos surat tu Huria Korintus asa boi antusan ni Huria i paboa ibana do Apostel nasasintongna. Dibagasan suratna i ma Apostel Paulus patupa pembelaan tu dirina nasasintongna ibana do Apostel i. Surat natinogos ni Apostel Paulus on ma nagabe pahothon dohot pamalum roha ni Huria Korintus marsihohot marhaporseaon di Jesus nasesuai di pangajarion najinalo nasida sian Tuhan i.

  

II.  Hatorangan

Pangajarion napinasahat ni Apostel Paulus tu Huria Korintus sian penjara i mambuat sian pangajarion na tarsurat 2 Musa 34. Didok ibana do sian habaranionna mandok paboa ndada songon si Musa ibana “ndang hutiru hami be si Musa namanghuphupi bohina, asa unang dibereng halak Israel ujung ni naolo salpu i”. Apostel Paulus naeng patangkashon paboa halak Kristen ingkon do dibagasan habaranion. Marhite habaranion do huria naparjolo i patupa kesaksian/ panindangion tu halak Jahudi dohot non-Jahudi (Ul.Ap. 2:29; 4:13; 29,31) taringot barita nauli i, ai dibagasan barita nauli ido hagogoon ndang adong naasing sian i (pat. Roma 1: 16-17). Dipangantusion ni Apostel Paulus ia namangkupkupi si Musa di dolok Sinai uju namanjalo patik i sian Debata nuaeng mangkupkupi haporseaon ni halak Israel/ Jahudi di padan naimbaru nabinagabagahon ni Jahowa tu nasida. Disi dijaha nasida patik i disi tartutup haporseaonna manjalo haluaon napinatupa ni Kristus i. Didok Apostel Paulus di ayat 14 “Alai gabe tangkang do rohanasida”. Sian hata on patuduhon nabuta ma halak Israel dipatik/ uhum najinaha nasida saleleng on. Ido umbaen ndang olo halak Jahudi manjalo/ manjangkon Kristus sipalua natinongos ni Debata (pat. Yoh. 12:40), sisi negatif ni halak Jahudi namanjaha patik i ima aha nabinagabagahon ni Debata di padan narobi dihaluaon dibagasan Kristus i i ndang diantusi jala diboto nasida. Saluhut naung jinanjihon ni Debata dinasida uju dipadan narobi dibatalhon nasida marhite sian naso olo nasida manjangkon Kristus dohot barita taringot tu Jesus i. Secara harfiahna ndada holan pikkiran alai dohot do roha nasida naso manjangkon karya/ ulaon Kristus naung singkop patupa haluaon i di nasida. Ido umbaen sai berpatokan tu patik ni si Musa nasida.

Di ayat 16 dibuhai Apostel Paulus do roha dohot pikkiran niaimbaru dinasida naolo manjangkon barita dohot haluaon ni Kristus i. nanidokna dison ima pertobatan/ hamubaon ni roha. Ganup halak naolo muba jala olo ro tu adopan ni Debata, saluhut angka pangambati ungkapon buaton ni Tuhan i do i. Didok muse di ayat 17 paboa naso tarsirang do Jesus dohot Tondi i, Tuhan i do Tondi i, jala ia disi Tondi i disi do Tuhan i. nanaeng sidohonon ni Apostel Paulus ia Tuhan nadidok di 2 Musa 34:34; ima Tondi nanidokna di ayat 17 on. Dihamubaon niroha i disi ma Tuhan i mambuat saluhut angka pangambati hita ro tu Tuhan i marhite Tondi-Na. Di Ul.Ap. 9: 17-18 dinamuba i Apostel Paulus mangoloi Tuhan i disi ma ibana mamboto ai nabodo do ibana nasaleleng on. Diparhatopot Apostel Paulus Tuhan i do napatauhon ibana gabe parhalado di padan naimbaru (2 Kor. 3: 6,9). Tondi i do napaluahon hita sian dosa i (Roma 6: 18), ima haluaon marpanghirimon, ganup angka anak ni Debata ndang be mngadopi hamagoan alai haluaon hasangapon nama. (Roma 8: 21), on ma jaminan sipasahaton ni Debata diangka namangoloi Ibana dingoluon. Diparhatopot Apostel Paulus haluaon najinalona sian Tuhan i ima habaranion laho marbarita nauli. Manghatahon hata hasintongan, atik pe diroha ni angka numbege sada parhataan nakoras do hata napinasahat ni Aposte i (pat. 2 Kor. 10: 10). Asa ganup halak naung dipauba Tondi ni Tuhan i jaloon ni ma tohap nasumurung jala ngolu ni ibana gabe sorminan ma, ai nungga rupa ni Kristus i di ibana (pat. 2 Kor. 4: 4, 6). Di halak naporsea ma dapot hita rumang ni Kristus naung paluahon hita sian hamatean i (lih. Roma 8: 29; Kolose 1: 15). Dibagasan rupa ni Kristus i do dagingta nalea on dipauba gabe doshon dagingna nasangap i (Pilipi 3: 21) atik pe ndang taida dope sihirimon ni haporseaonta i, marhite Tondi ma hita gabe dapotan dihaluaon dohot hamuliaon/ hasangapon ni Tuhan i (2 Kor. 1: 22, 25).   

III.    Panimpuli

Sada halak siihuthon Kristus i hita naeng ma taambolongkon sian roha dohot pikkiranta ganup angka namangambati hita marsaor dohot Tuhan i, naeng ma hita patuduhon sondang ni Kristus i asa gabe sorminan hita disaluhut halak nahumaliang